Золотное и лицевое шитье

Вопросы техники золотного и лицевого шитья. Символы и значение. История шитья.


    Как молиться перед началом вышивки, шитья

    Поделиться

    Admin
    Admin

    Сообщения : 129
    Очки : 264
    Репутация : 0
    Дата регистрации : 2010-02-05
    Возраст : 41

    Как молиться перед началом вышивки, шитья

    Сообщение  Admin в Пн Мар 01, 2010 12:37 pm

    Выкладывайте здесь известные вам молитвы перед началом вышивки и шитья и других рукоделий, акафисты (тексты и ссылки) святым, покровителям шитья и иконного писания

    Admin
    Admin

    Сообщения : 129
    Очки : 264
    Репутация : 0
    Дата регистрации : 2010-02-05
    Возраст : 41

    Акафист святой праведной Тавифе - покровительнице шитья

    Сообщение  Admin в Ср Мар 03, 2010 11:10 am

    Акафист святой праведной Тавифе милостивой
    Память совершается: 25 октября / 7 ноября и в Неделю о расслабленном

    Кондак 1
    Яко Спасову небесномудрую ученицу и благоутробия Божия одушевленную икону, песньми почитаем тя духовными, Тавифо, ты же яко таиннице доброты богодухновенныя умилостиви нам Единаго Благоутробнаго вопиющим ти:
    Радуйся, Тавифо, сосуде, благодати исполненный.

    Икос 1
    Ангел показалася еси радостотворный, святая, многообразно зде страждущим, сего ради ангельскими тя почестьми Христос Бог достолепно почил есть, Егоже милостива сотвори вопиющим ти таковая:
    Радуйся, любве божественная сокровищнице;
    Радуйся, премудрости вышней гостиннице.
    Радуйся, Божию благодать восприявшая;
    Радуйся, прелесть разумно оттрясшая.
    Радуйся, образе благостыни богатныя;
    Радуйся, светильниче божественнаго света.
    Радуйся, глубинно богодухновенных помыслов;
    Радуйся, высото обзорная деяний святых.
    Радуйся, житием своим Христа прославившая;
    Радуйся, добротою просиявшая.
    Радуйся, милосердие всем являющая;
    Радуйся, и нас любити ближних своих научающая.
    Радуйся, Тавифо, сосуде, благодати исполненный!

    Икос 2
    Воли тщанием совершенныя взоры души твоея к славе Божией простерла еси, и свет веры восприяла еси. Темже истинная явилася еси Христа ученица, Тавифо блаженная, восписующи благих Подателю: Аллилуия.

    Икос 2
    Благодати исполненная, образом явилася еси во жизни добродетельныя и благих сокровищнице, евангельская исполняющи повеления: темже нраву твоему божественному дивящеся, воспеваем ти сице:
    Радуйся, закона Христова исполнительнице;
    Радуйся, державы вражия низложительнице.
    Радуйся, образе жития добродетельнаго;
    Радуйся, исполнение глаголов животворных.
    Радуйся, огнь носящая благодати божественныя;
    Радуйся, имущая в душе Свет Невещественный.
    Радуйся, лозо благоплодная Винограда Живоноснаго;
    Радуйся, жено небесномудрая и богоприятная.
    Радуйся, яко Бога человеколюбия последила еси;
    Радуйся, яко Диавола человеконенавистничество омерзила еси.
    Радуйся, безплодныя суеты нас отвращающая;
    Радуйся, к Свету спасительному обращающая.
    Радуйся, Тавифо, сосуде, благодати исполненный!

    Кондак 3
    Немощных и страждущих врачевала еси, крепость от сердца твоего изливавши обильно, Христа сими прославляя, безсмертныя сподобилася еси от Того славы. Темже убо невещественно воспеваеши ныне Человеколюбивому Богу: Аллилуия.

    Икос 3
    Воссияла еси во Иоппии дарами божественными, Тавифо богомудрая блаженная. Христове Церкви жития твоего лучи простерши, сими же и мы просвещении обрадовано вопием ти:
    Радуйся, сердце милостивное имущая;
    Радуйся, утешение всем подающая.
    Радуйся, души недуги исцеляющая;
    Радуйся, верным во всем помогающая.
    Радуйся, милости точащая струи;
    Радуйся, ангельским ревнующая чином.
    Радуйся, серною нарицаемая;
    Радуйся, крине неувядаемый.
    Радуйся, яко тебе ради процвела Иоппия древняя;
    Радуйся, яко до днесь почитают тя иоппийстии людие.
    Радуйся, яко к заступничеству твоему прибегают;
    Радуйся, яко молитв твоих испрошают.
    Радуйся, Тавифо, сосуде, благодати исполненный!

    Кондак 4
    Умершую тя, плачущим Петр первоапостол живою представи, честная Тавифо, жительства твоего достоинство всем являя, с тобою Христу Спасу вопиющим: Аллилуия.

    Икос 4
    Во Иоппию пришедый иногда воздвигл тя есть Петр повелением вся Творящаго, темже возрадовался убо зело есть, приемля тя живу, честная, с ним же молися, милостивая, о воспевающих сице:
    Радуйся, освященная Богом Словом;
    Радуйся, своим сияющая житием.
    Радуйся, закону естества бывшая яко мертвенная;
    Радуйся, воскресшая словом веры.
    Радуйся, паки на земли пожившая;
    Радуйся, паки же милосердием своим всем послужившая.
    Радуйся, временным успением твоим миру явленная;
    Радуйся, испрошающая тому милостивно спасение.
    Радуйся, яко силу любы светозарно явила еси;
    Радуйся, яко Духа сияние прияла еси.
    Радуйся, апостолом, воздвигнутая от одра смертнаго;
    Радуйся, яко призре Господь на молитву верных.
    Радуйся, Тавифо, сосуде, благодати исполненный!

    Кондак 5
    Сострастием твоим и милостями богатными поработала еси, щедрая. Начальнику милости, служительница Того преславная и апостолов сподвижница явилася еси, яко славная ученица, Тавифо, вопиющи к Богу: Аллилуия.

    Икос 5
    Верою твоею святою и любовию совершенною, Тавифо, Спасу Иисусу приблизилася еси, и Того преславная исполнительнице показалася еси заповедей. Тех же светлостию просвети убо благоговейно поющия ти:
    Радуйся, лампадо светлосиятельная;
    Радуйся, божественной благодати органе.
    Радуйся, Спасово богодухновенная служительнице;
    Радуйся, апостолов святых сподвижнице.
    Радуйся, финикс благотворения многоплодный;
    Радуйся, свиреле милосердия сладкозвучная.
    Радуйся, ниво, плодящая нравы благия;
    Радуйся, саде, растящий дарования святая.
    Радуйся, целомудрия вдовиц утверждение;
    Радуйся, водительство благостынное нищих.
    Радуйся, многих труды облегчающая;
    Радуйся, стенания душевная пресекающая.
    Радуйся, Тавифо, сосуде, благодати исполненный!

    Кондак 6
    Проповедницами не токмо во Иоппии, но и во всей Церкви честней людие явишася, щедротами твоими, Тавифо, утешеннии, имя Христово прославляюще, вопиюще с тобою вкупе: Аллилуия.

    Икос 6
    Искупление вечное во Христе обретшая и кровию Его честною освященная, искупи в лишениях сущих рукама твоима щедродательныма, о всечестная, стенящих в нуждах, обаче же паки со упованием восклицающих:
    Радуйся, небесное приявшая богатство;
    Радуйся, обильно от него всем подающая.
    Радуйся, сердец преогорченных веселие;
    Радуйся, скорое вдовиц посещение.
    Радуйся, печали разрешение;
    Радуйся, благодати раздаятельнице.
    Радуйся, яко обе руце в милости простираеши;
    Радуйся, яко пламень нуждный угашаеши.
    Радуйся, образ Божий в каждом усмотряющая;
    Радуйся, сердца твоего и от нас не отвращающая.
    Радуйся, скорбей житейских отгнание;
    Радуйся, душ наших упование.
    Радуйся, Тавифо, сосуде, благодати исполненный!

    Кондак 7
    Содейственница явльшися учеником Спасовым, просвещения истиннаго Божественнаго исполнилася еси, и миру Христова показалася еси ученица, целомудренно житие твое исправльши, Тавифо, Богу вопияше: Аллилуия.

    Икос 7
    Непорочным житием твоим, закона исполнением евангельскаго, благоплодная явилася еси в доме Божии маслина, яко же Давид провозгласи, богомудрая, елеем трудов твоих твоих веселящая всех, тебе вопиющих:
    Радуйся, благодати Божественныя гобзование;
    Радуйся, вражескаго обмана попрание.
    Радуйся, носительнице духа евангельскаго;
    Радуйся, свиреле законов богоданных.
    Радуйся, цвете благоуханнейший закона духовнаго;
    Радуйся, сосуде таинственнаго преисполненный веселия.
    Радуйся, яко добродетели деяньми изобилуеши;
    Радуйся, яко внутренняя сокровища твоя являеши.
    Радуйся, яко житие твое честно совершила еси;
    Радуйся, яко талант свой преумножила еси.
    Радуйся, ничесоже себе искавшая;
    Радуйся, единому Богу работавшая.
    Радуйся, тавифо, сосуде, благодати исполненный!

    Кондак 8
    Сродником же и странным и всем труждающимся многочастно послужила еси. Темже тя, милостивую, Христос Бог почти премилостивый святости дарованием. Ему же воспеваеши присно: Аллилуия.

    Икос 8
    Иже и в Раи сияющая благоутробия светлостию и нравы братолюбными, к Богу преставльшаяся в радости, Тавифо всеблаженная, яко божия причастница прославилася еси. Сего ради и мы, недостойнии, воспеваем ти сице:
    Радуйся, ангелов спребывательнице;
    Радуйся, лику святых сопричастнице.
    Радуйся, светлость Христову созерцающая;
    Радуйся, от плодов древа жизни вкушающая.
    Радуйся, улучившая от славы преестественныя;
    Радуйся, почести нетленныя сподобльшаяся.
    Радуйся, дарами многоразличными блистающая;
    Радуйся, Господеви нас привождающая.
    Радуйся, наследнице вечныя радости;
    Радуйся, причастнице райския сладости.
    Радуйся, яко о почитающих тя Христа умоляеши;
    Радуйся, яко тех упование не посрамляеши.
    Радуйся, Тавифо, сосуде, благодати исполненный!

    Кондак 9
    Веры деяньми божественно украсившися яко же любви сокровищнице, небеснаго благаго избрания причастницею явилася еси, Тавифо преславная. Того же избрания молитвами твоими и нас сподоби вопиющих: Аллилуия.

    Икос 9
    Потоками твоея милости напои иже во глубоцей нужде люте жаждущих, Тавифо. Понеже, яко источниче сострадательных словес, сладостию глагол твоих утешительных изымаеши от всякия скорби тебе вопиющих:
    Радуйся, доброт душепитательных неистощимый источниче;
    Радуйся, небесных добродетелей богосиянный столпе.
    Радуйся, рук твоих умением присным удивлявшая;
    Радуйся, от трудов твоих ризами их одеявшая.
    Радуйся, алчущих насыщение обильное;
    Радуйся, печальных сострадание тихое.
    Радуйся, многих уста утешения;
    Радуйся, нагих одеяние спасения.
    Радуйся, толкующим отверзающая;
    Радуйся, просящих мудро обогащающая.
    Радуйся, никоегождо неутешным оставляющая;
    Радуйся, дары божественныя нам подающая.
    Радуйся, Тавифо, сосуде, благодати исполненный!

    Кондак 10
    Во смирении глубоце дела милосердия творила еси, от самых лишь близких знаемая. Обаче же Сердцеведец Бог тя прослави, да не скрыется светильник под спудом, но светит всем добрыми делами своими прославляющи Отца небеснаго: Аллилуия.

    Икос 10
    Жития твоего, Тавифо, славу, аки крин белый венца цветонеувядаемаго Иисусова, Лука являет нам богомудрый боговещательно. Темже общее уверяя всех воскресение о тебе, со одра смертнаго воздвигнутой, радующихся:
    Радуйся, света небеснаго светильниче;
    Радуйся, образе жития добродетельнаго.
    Радуйся, Христова ученице, сосуде благодати;
    Радуйся, яко поставлена в Церкви его сияти.
    Радуйся, преисполненная небесных дарований;
    Радуйся, избавленная нечаянных искушений.
    Радуйся, непорочно во Иоппии пожившая;
    Радуйся, ангельскому житию поревновавшая.
    Радуйся, внутрь славу имущая, яко дщерь царева;
    Радуйся, Божией Матери ревнующая в доброделании.
    Радуйся, Христово благоутробие приклоняющая;
    Радуйся, силу любы крепльшую смертных уз являющая.
    Радуйся, Тавифо, сосуде, благодати исполненный!

    Кондак 11
    Песнь благодарственную Спасови, источник сострадания тебе даровавшему, приношаху иоппиистии люди, на всяк день благодеянии твоими напояемии, Тавифо богоблаженная, воспевая с тобою вкупе: Аллилуия.

    Икос 11
    Света незаходимаго приснозрительнице, от здешних к славе нетленней преставльшаяся, Тавифо сиятельная, и Сиона вышняго великолепием наслаждающаяся, молися о нас, воспевающих ти таковая:
    Радуйся, яко в скинию вселилася еси Света умнаго;
    Радуйся, яко сподобилася еси Христова сияния.
    Радуйся, яко сладость любве источаеши;
    Радуйся, яко прелесть горечь разоряеши.
    Радуйся, от имений своих всечудная раздаятельнице;
    Радуйся, сокровищ нетленных всечестная стяжательнице.
    Радуйся, ученик Христовых собеседнице;
    Радуйся, верных Тому посреднице.
    Радуйся, Троицу присно прославляющая;
    Радуйся, спасение нам испрошающая.
    Радуйся, яко тобою от падений избавляемся;
    Радуйся, яко к Богу тобою привождаемся.
    Радуйся, Тавифо, сосуде, благодати исполненный!

    Кондак 12
    Со святых лики и со ангелы присно радующися, святая блаженная Тавифо, непреходящею о Бозе радостию, молися убо и о еже избавитися нам от всякия скорби душевныя. Яко да и мы славословити Бога в радости и воспевати сподобимся: Аллилуия.

    Икос 12
    Хваляще воспеваем твоих, Тавифо, совершенств богатство. Но росу благоутробия Божественнаго и на нас свыше испроси, умилостивляющися о нас грешных тебе вопиющих:
    Радуйся, селений вышних служительнице;
    Радуйся, предстательнице наша и попечительнице.
    Радуйся, апостолов славных спребывательнице;
    Радуйся, истинной радости причастнице.
    Радуйся, милосердия небеснаго богатство неистощимое;
    Радуйся, и моя у Бога ходатаице непостыдная.
    Радуйся, всякия беды отвращающая;
    Радуйся, за всех Христа умоляющая.
    Радуйся, душевную очищающая скверну;
    Радуйся, славу зрящая Божию.
    Радуйся, верных принимающая пение;
    Радуйся, испрошающая нам спасение.
    Радуйся, Тавифо, сосуде, благодати исполненный!

    Кондак 13
    О богомудрая святая Тавифо блаженная, ученице Христа богоносная, прими наше пение сие яко приношение посильное, и ущедри ны от даров милости твоея, да Богу вопием вси: Аллилуия.

    Молитва
    О блаженна еси, святая Тавифо, возросшая в винограднице Христове, он же и есть Церковь Божия. От лозы истинныя Иисуса Сладчайшаго почерпла еси божественныя токи благодати, ими же уплодоносилася от земли к Небесным. Яко грозд винный, напитай нас и увесели подражанием тебе в добрых делах, да сподобимся неизреченных благ. Проповедаше сице Господь: «яко аще зерно пшеничное, павше в землю, не умрет – едино пребывает, аще же умрет – сотворит плод изобильный». Успение твое, Тавифо, явися плодоносно не токмо твоея добродетели ради – сия же ныне во услышание Церкви всей явися яко образ достоподражательный многим – наипаче сие сотворися во утверждение веры Христовы, отверзающей человеком райския двери: да сочетаваются Небесная с земными. Мы же, в добродетелех оскудевши, молитв твоих ко Всещедрому просим: да спасет и помилует души наша, мирови же подаст мир и велию милость. Днесь собори верных ликовствуют, прославляюще величие добродетели, еже яви Господь в житии Святей своей ученицы, кая процвела яко финикс, приумноживши таланты Господни. Испроси, о Тавифо, ублажающим тя оставление прегрешений. Аминь.

    Тропарь, глас 4:
    Днесь вера Христова утверждается каменем веры, / и ликовствует в веселии Иоппия, / псаломски славословят Жизнодавца Сына Божия вернии, / видяще совершаемое велие чудо: / первоверховный апостол глаголет, / и умершая востает от гроба, / юже Низложитель смерти дарует Церкви, / да украшаются во образ ея добродетельми людие. / Приидите убо, христиане, / принесем ко святей моления наша: / блаженная Тавифо и милосердная, / вознеси наша воздыхания Пресвятей Троице, / и молися со дерзновением, / да сынове Света Превечнаго будем, / да сподобимся Божия милости, / да пребываем в любви Божественней, // и да царствует мир во вселенней.

    Ин тропарь, глас тойже:
    Апостолом сотаиннице, милостивая Тавифо, / обители женския начало положила еси / и бедным одеяние была еси, / послушнице смиренная, / слову апостола Петра повинувшися, / из мертвых силою Христовою возстала еси, / и ныне на Небесех светло празднуеши. / Темже моли Христа Бога // всем, поминающим тя, даровати живот вечный.

    Кондак, глас 4:
    Ужасахуся Иоппийстии людие, и дивляхуся ангели Божии, / егда Исцеливый Еннея воззва от мертвых серну нарицаемую, милосердием преукрашенную, / о нейже к Нему взываху вдовицы неимущия. / И ныне, Тавифо блаженная, услыши молитвы наша, к тебе приносимыя, / и испроси у всяческих благ Подателя милости и щедроты верным Его, / да блажаще тя, вопием ти: // радуйся, добродетели нас научающая.

    Ин кондак, глас 8:
    Первоначальная Церковь ликовствует, / и Иоппия тобою, Тавифо, просвещается, / из мертвых твоему воскресению радующися, / и мы, память твою ныне празднующе, / славим Победителя смерти – Христа Бога, // общаго святаго Воскресения чающе.

    Величание
    Величаем тя, / святая праведная Тавифо, / и чтим святую память твою, / ты бо молиши за нас // Христа Бога нашего.

    Автор акафиста неизвестен: текст был найден на клиросе среди других бумаг. Возможно предыдущий настоятель храма привез его со святой горы Афон

    Марина ол

    Сообщения : 4
    Очки : 4
    Репутация : 0
    Дата регистрации : 2010-05-15

    Re: Как молиться перед началом вышивки, шитья

    Сообщение  Марина ол в Сб Май 15, 2010 4:02 pm

    Господи Иисусе Христе, Боже наш, Сый неописан по естеству Божества, и ради спасения человека в последние дни от Девы Богородицы Марии неизреченно воплотивыйся, и благоволивый тако во плоти описуем быти, иже святый образ пречистаго лика Твоего на святом убрусе напечатлел еси, и оным недуг князя Авгаря уврачевал еси, душу же его просветил еси во еже познати истиннаго Бога нашего, Иже Святым Духом вразумил еси божественнаго апостола Твоего и евангелиста Луку написати образ Пречистыя Матере Твоея, держащей Тебя, яко младенца, на объятиях Своих, и рекшей: "Благодать от Мене Рождшагося, Мене ради, да будет с сим образом": сам, Владыко, Боже всяческих, просвети и вразуми душу, сердце и ум раба твоего (имя рек), и руки его направи, во еже безгрешно и изрядноизображати жительство Твое, Пречистыя Матере Твоея, и всех святых, во славу Твою, ради украшения и благолепия святыя церкве Твоея, и во отпущение грехов всем, духовно покланяющимся святым иконам, и благоговейно лобызающим оныя, и почитание относящим к Первообразу. Избави же его от всякаго диавольского наваждения, егда преуспевает заповедях Твоих, молитвами Пречистыя Матере Твоея, святаго славнаго апостола и евангелиста Луки и всех святых. Аминь.

    http://www.nesusvet.narod.ru/ico/books/molitva.htm

    Admin
    Admin

    Сообщения : 129
    Очки : 264
    Репутация : 0
    Дата регистрации : 2010-02-05
    Возраст : 41

    Акафист Параскеве Пятнице

    Сообщение  Admin в Пт Май 21, 2010 12:59 am

    Акафист святой великомученице Параскеве Пятнице

    Кондак 1


    Избранной Богом от рода благороднаго, иконийскаго града, премудрой и всехвальной невесте Христове, яко избавляемии тобою от искушений и бед, благодарственная пения и хваления восписуем ти молитвенницы твои, святая и многострадальная мученице Параскево. Ты же, имея дерзновение ко Господу, от всяких нас бед свободи, да со умилением и радостию зовем ти:
    Радуйся, Параскево, невесто Христова всехвальная.


    Икос 1


    Ангелом честную и вселюбезную чистоту твоего сердца, многострадальная Параскево, непорочно сохранши, ангелом собеседница быти сподобилася еси. С нимиже воспевая Трисвятую песнь Богу на небеси, услыши и нас, верою и любовию чтущих тя и вопиющих ти хваления сия на земли:
    Радуйся, отроковице, Богом Отцем представленная быти сообразной в страдании образу Сына Его;
    Радуйся, и Сыном Божиим укрепленная на подвиги страдальческия.
    Радуйся, истинную веру в Животворящую и Единосущную Троицу свято соблюдшая;
    Радуйся, святое целомудрие и девственную непорочность добре сохраншая.
    Радуйся, яко радостно уневестилася еси безсмертному Небесному Жениху, Христу;
    Радуйся, земнаго обручника паче Небеснаго знати не восхотевшая.
    Радуйся, яко цвет чистоты, в неувядаемой славе цветущая;
    Радуйся, яко крин, вонями твоих добродетелей нам благоухающая.
    Радуйся, в Небесном вертограде неизреченною радостию наслаждающаяся;
    Радуйся, краснейшаго паче сынов человеческих зрением тамо утешающаяся.
    Радуйся, убелившая ризы твоея в крови Агнчей на земли;
    Радуйся, в лике девственниц предстоящая Божиему Агнцу на небеси.
    Радуйся, Параскево, невесто Христова всехвальная.


    Кондак 2


    Видевше благолепие лица твоего, святая мученице Параскево, людие удивляхуся, взирающе на тя, не у ведяще красоты души твоея. Мы же, поминающе светлейшия паче солнца добродетели твоя, поим Господеви, даровавшему тебе благодать Свою: Аллилуйя.


    Икос 2


    Мудрости вместилище паче ума мирских мудрецев явилася еси, отроковице непорочная, измлада уклонившися от любве к миру и отвергшися всего яже в мире, всею полнотою любве твоея возлюбила еси Небеснаго Жениха Христа, Царя Славы, Емуже, яко верная раба, в житии твоем апостольски послужила еси, живши свято среди неверных и безбоязненно проповедавши им Христа Бога. Таковому твоему разуму дивящеся, сия похвалы тебе восписуем:
    Радуйся, премудрая Евангельская дево, во свете веры и дел благих ходившая;
    Радуйся, Христа Господа, Божию силу и Божию премудрость паче всего возлюбившая.
    Радуйся, паче мудрецев мира сего мудрейшая;
    Радуйся, паче старец идолослужительных разумевшая.
    Радуйся, неверных светом веры просвещающая;
    Радуйся, чад Церкве Христовы в вере утверждающая.
    Радуйся, любовию твоею ко Христу ангельская ликостояния возвеселяющая;
    Радуйся, демонския лукавствия оружием креста Господня отгоняющая.
    Радуйся, в проповедании веры богоглаголивая уста апостолькая;
    Радуйся, дев христианских украшение.
    Радуйся, верная ко Христу Богу молитвеннице о нашем спасении;
    Радуйся, всех скорбящих крепкое заступление и ограждение.
    Радуйся, Параскево, невесто Христова всехвальная.


    Кондак 3


    Силою Христовою соблюдаема, всеславная мученице Параскево, о болезнех телесных небрегла еси, подвигом добрым подвизатися хотящи. Мужеским смыслом вооружившися, слабость женскую отвергла еси, упованием же укрепившися, радостно предстала еси на судище, идеже ясно веру в Троицу Божественную проповедала еси, Богу вопиющи: Аллилуйя.


    Икос 3


    Слышав от тебе, мудрая дщерь, неправедный судия неслыханная словеса о твоем рождении, яко благочестивии родители твои, страсти Христовы почитающе, знаменитаго дне тезоимениту тя нарекоша, Параскевою, в предзнаменование, яко Христовых страстей имаши быти причастницею. Не разуме же сего нечестивый игемон, но вещаше ти безстудная словеса и повеле бити тя суровыми жилами и полумертву тя сущу ввергнути в темницу. Ты же доблественне претерпевши жесточайшия муки, в темнице, аки в чертозе светле ликующи, вопияла еси: "Никогда не отлучуся Тебе, Господи, но посли ми помощь Твою и спаси мя великия ради Твоея милости". Темже, ублажающе тя, вопием ти таковая:
    Радуйся, незлобивая голубице, от искушений лукаваго врага свободившаяся;
    Радуйся, словесная агнице, от злаго волка мучителя к доброму пастырю Христу Богу прибегшая.
    Радуйся, во двор словесных овец, одесную Его стоящих, вшедшая;
    Радуйся, на брак Агнчий радостно текущая.
    Радуйся, яко тебе уготовано есть благо вечных сокровище;
    Радуйся, яко тебе обетовано есть блаженство Царства Небеснаго.
    Радуйся, премудрая Евангельская дево, светлогорящий светильник имущая;
    Радуйся, дерзновение велие ко Христу Богу стяжавшая.
    Радуйся, волею своею благое иго Христово на ся подъявшая;
    Радуйся, сердце свое от всякия лести душевредныя чисто сохраншая.
    Радуйся, истинная Христовых страстей причастнице;
    Радуйся, во страданиях твоих благодатную помощь от Христа Господа получившая.
    Радуйся, Параскево, невесто Христова всехвальная.


    Кондак 4


    Бурю тяжких искушений воздвигоша врази противу тебе, многострадальная Параскево; ты же от твоих кровей трудолюбно чашу страданий испила еси, желающи по Христе, Женисе твоем, во след потещи, прехвальная мученице, и яко ластовица доброгласная, песнь воспевала еси Христу Богу: Аллилуйя.


    Икос 4


    Имея всегда пред очами своими Господа, за исповедание веры палицами немилостивно от мучителей биема, радовалася еси, приснопамятная мученице Параскево, вопиющи: "Ничто же мя разлучит от любве Твоея, Христе", и тако подвизаяся во Славу Божию, угодила еси Господу. Темже, поминающе честная твоя страдания, с умилением зовем ти:
    Радуйся, агнице вседобляя, пастыреначальнику Христу принесшаяся, яко жертва благоуханная;
    Радуйся, безсмертному Жениху Христу непорочное мучение твое, яко вено пречестное, представившая.
    Радуйся, отроковице чистая, истинное исповедание веры православныя пред неверными явившая;
    Радуйся, праведная обличительнице, неправду нечестиваго судии яве открывшая.
    Радуйся, яко тобою посрамися лукавый враг, видящь себе от юной девы побежденна;
    Радуйся, яко радуются о тебе и силы небесныя, видяще тя немощну и младу сущу, побеждающую лютых мучителей.
    Радуйся, голубице чистая и непорочная сердцем;
    Радуйся, смиренная агнице, благоуспешно честней и блаженней страсти Господней уподобльшаяся.
    Радуйся, яко принеслася еси Зиждителю твоему, яко кадило благовонное;
    Радуйся, яко зрит на тя пресветлое Солнце правды, тридневно возсиявшее от гроба и укрепившее тя к подвигу страдальческому.
    Радуйся, яко за преславная твоя страдания сподобилася еси внити в чертог Христа Царя Небеснаго;
    Радуйся, яко тамо вкупе со святыми наслаждаешися неизреченною радостию.
    Радуйся, Параскево, невесто Христова всехвальная.


    Кондак 5


    Благочестною звездою прешла еси в мире, страстотерпице славная Параскево, яко веру во Христа всем проповедающи. Страдания многа и люта мужески претерпевши, мучителя посрамила еси и ко Христу Господу, яко свету незаходимому, радостно востекла еси. Емуже предстоящи с лики праведных, выну вопиеши: Аллилуйя.


    Икос 5


    Видяще силы небесныя плотию страждущую Параскеву, Его силою крепящуюся, глаголаху: "Се, и девы на земли прославиша Господа!" Человецы же, трепетом одержими, ужасахуся, и удивляющеся, песньми прославляху: "О чудесе! Дева врага победи и молится милостивому Владыке за спасение мира". Сего ради и мы, поминающе исполненное веры мужество твое, преславная мученице, ублажаем тя, глаголюще:
    Радуйся, доблественная страстотерпице, в защиту веры православныя подвизавшаяся;
    Радуйся, наветов вражиих мудрая разорительнице.
    Радуйся, иконийскаго града учительнице;
    Радуйся, идольския суетныя лести обличительнице.
    Радуйся, верных смыслы вонями добродетелей твоих благовонствующая;
    Радуйся, смрад страстный благодатию, свыше ти данною, отгоняющая.
    Радуйся, еллинския кумиры, яко прах, уничижившая;
    Радуйся, твоими подвиги, иже к Богу, тьмы начальника низложившая.
    Радуйся, горняя, паче дольних, восхождения в сердце твоем положити возлюбившая;
    Радуйся, Христу Господу, человеколюбцу, всю себе предавшая.
    Радуйся, подобне первомученице Фекле, мног народ словом Божиим просветившая;
    Радуйся, неверных к Божественней вере приведшая.
    Радуйся, Параскево, невесто Христова всехвальная.


    Кондак 6


    Проповедницу чудес и славы Божия явила еси себе, доблестная мученице Параскево, после преславнаго исцеления в темнице, от Христа Господа дарованнаго. Емуже возсылая благодарственная моления, радостно мы вопием: Аллилуйя.


    Икос 6


    Возсияла еси, яко светозарная звезда, обагрившися каплями кровными, и Божественною благодатию отгнала еси безбожия тьму, мученице Параскево, просветивши верныя, чтущия твоя доблественныя подвиги. Темже восхваляюще тя, усердно вопием ти:
    Радуйся, богомудрая дево, Христовых страстей общнице;
    Радуйся, в темнице ти сущей, ангельскаго посещения сподобльшаяся.
    Радуйся, в отраду болезней твоих орудия страстей Христовых созерцавшая;
    Радуйся, честный крест и терновый венец нетленнаго Жениха твоего, Христа, узревшая.
    Радуйся, язвы Господа на теле твоем носившая;
    Радуйся, от всех язв Тем же Господом чрез ангела исцеленная.
    Радуйся, яко Той же Господь даровал тебе крепость и премудрость, ейже не возмогоша противитися вси противляющиися истине;
    Радуйся, от кровей твоих светлую себе ризу исткавшая.
    Радуйся, яко тобою от многих ран грешнии исцеляются;
    Радуйся, яко тобою от различных болезней с верою тя призывающих здравие приемлют.
    Радуйся, уз греховных скорая решительнице;
    Радуйся, о всех христианах пред престолом Божиим верная молитвеннице.
    Радуйся, Параскево, невесто Христова всехвальная.


    Кондак 7


    Хотящу безумному мучителю игемону желание свое улучити и паки покушающуся ласкательными словесы тебе, святая мученице Параскево, от истиннаго Бога обратити к поклонению идолом; ты же, яко богомудрая дева, вразумляя его в суетстве идолов, рекла еси ему: "Покажи ми, игемоне, богов, ихже ты мниши исцеливших мя от ран", и по велению мучителя пришедши в храм идольский, помолилася еси единому истинному Богу, от Егоже Святаго имене вси идоли падоша и разсыпашася в прах, во уверение, яко един есть Бог, прославляемый во Святей Троице, Емуже вкупе со святыми ангелами выну вопиеши: Аллилуйя.


    Икос 7


    Новую показа безчеловечия ярость зверообразный мучитель, егда тебе, святая мученице Параскево, повеле на древе повесити и свещами горящими опаляти твоя девическая ребра. Сие пачеестественное терпение твое благоговейно воспоминающе, похвалами блажим тя сицевыми:
    Радуйся, многообразныя болезни за Царя Христа Бога претерпевшая;
    Радуйся, яко пред лицем человеческим аще и муку прияла еси, упование же твое безсмертия исполнено есть.
    Радуйся, яко повешена была еси на древе Христа ради, на кресте распятаго, да венцем нетления от Него увязешися;
    Радуйся, яко строгана была еси по ребром, Иисуса ради копием в ребро прободеннаго, да Царствием Его Небесным насладишися.
    Радуйся, яко огнь любве к Богу в сердце твоем возжгла еси;
    Радуйся, яко за Того свещами огненными палима была еси.
    Радуйся, твердейшая адаманта в терпении твоем показавшаяся;
    Радуйся, в вере во Христа Господа крепчае паче камене, в мужестве непоколебимом пребывшая.
    Радуйся, яко огнем опаляема, огненною мудростию пламень угасила еси естественный;
    Радуйся, яко свещу неугасиму душевную соблюдши, вошла еси со Христом Женихом твоим в чертог Небесный.
    Радуйся, яко чудесными искрами страсти умертвивши, демонския полки страдальчески победила еси;
    Радуйся, яко страданиями твоими много народ к познанию истиннаго Бога привела еси.
    Радуйся, Параскево, невесто Христова всехвальная.


    Кондак 8


    Странное и страшное святыя мученицы Параскевы страдание видяще, вернии удивляхуся зело; како млада отроковица сущи, в юностнем телеси таковыя мужественно за Христа терпит муки, слезнаго исполнишася умиления; невернии же трепетом одержими и чудесными искрами опаляеми от ангела, бежаху; мы же, прославляюще дивнаго во святых Бога, вопием: Аллилуйя.


    Икос 8


    Весь Сладчайший Иисус сладость, весь желание тебе бысть, святая мученице Параскево: сладце бо Его ради горькия терпела еси муки, глаголюще к мучителю: "Враже нечестивый игемоне, что неистовствуеши на христианы; ни царства у тебе отъях, ни града твоего разорих, но буими словесы увещати мя помышляеши. Аз плоти моея не щажду за Христа моего, зане Он любит мя: к Нему пойду и Того буду невеста. Той мене спасет от рук враг моих и дарует ми жизнь вечную". Поминающе сицевая твоя словеса и доблественныя подвиги твоего исповедничества, вопием ти:
    Радуйся, злобы неверных не устрашившаяся;
    Радуйся, твари паче Создавшаго не послужившая.
    Радуйся, во еже сопротивлятися врагом Божиим, в духовное всеоружие благодати Божией облекшаяся;
    Радуйся, идолом немым и глухим в капище идольском не поклонившаяся.
    Радуйся, именем всесильнаго Господа и твоею к Нему молитвою вся идолы тамо сокрушившая;
    Радуйся, демонов коварствия божественною силою упразднившая.
    Радуйся, томления мучителей крестом Господним, яко державным оружием, мужески победившая;
    Радуйся, огненное опаление и жжение девственнаго телесе твоего в воню мира Христу Богу принесшая.
    Радуйся, веру, надежду и любовь к Богу сохраншая;
    Радуйся, победы венец от руки Христа жизнодавца приемшая.
    Радуйся, реко, исполненная благодати Божия водами;
    Радуйся, источниче кипящий чудес излияний.
    Радуйся, Параскево, невесто Христова всехвальная.


    Кондак 9


    Всеми богокрасными лепотами добродетелей украсивши себе, прехвальная мученице Параскево, явилася еси тверда и непоколебима во исповедании веры Христовы. Сего ради ангельское естество велиею возрадовася радостию, узревши мужественную крепость твою и твердое твое упование. И мы слышавше, како посрамися лукавый враг, от девы побеждаемь, и како сам Христос Бог достойно венчает тя мученицу, купно с тобою радостно вопием прославляющему тя Господу: Аллилуйя.


    Икос 9


    Витийствующий язык не возможет восхвалити дела твоя и великия страдальческия твоя подвиги по достоянию, славная мученице Параскево: кто бо повесть страдания твоя и добродетели; на судищи бо исповедавши истиннаго Бога, от безчеловечных мучителей претерпела еси лютая, болезненная страдания; и в сих жестоких болезнех бывши палицами биема, железными ноготьми строгаема и огнем палима, ничтоже ино вещала еси к Создателю твоему, токмо сие: "Спаси мя, Господи, недостойную рабу, не разлучи мене, Христе, от Твоего желания!" Смиренно поминающе сицевая твоя страдания, умиленную песнь приносим ти, глаголюще:
    Радуйся, кровию страдания твоего Христу Богу уневестившаяся;
    Радуйся, страстем Христовым подражавшая.
    Радуйся, любве ради Господни жестокия мучения претерпевшая;
    Радуйся, от Небеснаго Царя благолепный венец восприявшая.
    Радуйся, яко всем верным воспоминание твое пресладко;
    Радуйся, яко всей Церкви Христовой имя твое пречестно.
    Радуйся, досточудное ангелом и человеком зрелище бывшая;
    Радуйся, и самых мучителей непобедимым терпением твоим удивившая.
    Радуйся, яко сам Господь свыше призре на твоя страдания;
    Радуйся, яко Сам Той подвигоположник похвали твоя подвиги.
    Радуйся, девам доброто и похваление;
    Радуйся, мучеником красото и верным утешение.
    Радуйся, Параскево, невесто Христова всехвальная.


    Кондак 10


    Спасти хотя душу твою, о теле твоем всячески небрегла еси, святая мученице Параскево; егда бо на тя и мечное на смерть осуждение изыде от беззаконнаго мучителя, ты под меч острый, аки под венец красный, радостно потекла еси; и во главу усекновена бывши, душею твоею воспарила еси в чертог Жениха твоего безсмертнаго, Христа Бога, Емуже выну на небесех ныне воспеваеши: Аллилуйя.


    Икос 10


    Стена была еси крепка и непоколебима во исповедании веры в Триединаго Бога: сего ради многоболезненная страдания от мучителя претерпела еси, и добре скончавши течение твое, венец от Христа Бога прияла еси, и ангельских ликостояний на небеси сподобилася еси. Темже поминающе твоя подвиги, ублажаем тя, многострадальная:
    Радуйся, течение мученическаго пути добре скончавшая;
    Радуйся, веру безсмертному Жениху Христу до смерти сохраншая.
    Радуйся, в житии твоем богоугодными делы Господеви послужившая;
    Радуйся, за любовь ко Христу Богу всю мирскую суету отвергшая.
    Радуйся, силою свыше на брань противу сил преисподних препоясанная;
    Радуйся, победоносною славою в вышних от Христа победителя одеянная.
    Радуйся, оружием благоволения Божия венчанная на земли;
    Радуйся, цветом неувядаемым украшенная на небеси.
    Радуйся, христианом крепкое прибежище;
    Радуйся, верным твердое заступление.
    Радуйся, безпомощных защитительнице;
    Радуйся, сирых покровительнице.
    Радуйся, Параскево, невесто Христова всехвальная.


    Кондак 11


    Пение наше всякое побеждается, и многое множество хвалебных песней, восписуемых ти, несть довольно по достоянию восхвалити тя, прехвальная мученице Параскево; обаче молитвами твоими получающе от Христа Бога неисчетная благодеяния, благодарни суще, поем о тебе Ему: Аллилуйя.


    Икос 11


    Возсиявши нам, яко светило светозарное, мрак демонский от человек твоими мольбами отгоняеши, святая мученице Параскево, приемши бо благодать целити недуги, всем верным, притекающим к тебе с молитвою, подаеши исцеление: кровоточивии бо и прокаженнии прикосновением к раце мощей твоих очищаются, глусии слышат, разслабленнии здравии бывают призыванием святаго твоего имене. Мы же, поминающе скорое заступление твое, вопием ти:
    Радуйся, благовонная смирно, Церковь Христову благоухающая;
    Радуйся, благонадежная молитвеннице, фимиам молитвы о нас к Богу приносящая.
    Радуйся, мироположнице исцелений неоскудная;
    Радуйся, сокровище Божиих даров неиждиваемое.
    Радуйся, чаше, от обилия дому Божия черплющая радость;
    Радуйся, сосуде, от исполнения Христова приемлющий всех благ небесных сладость.
    Радуйся, благодатную росу исцелений всем верным источающая;
    Радуйся, скорбныя сердца недужных дарованием исцелений ободряющая.
    Радуйся, яко Христос Бог за доблественная твоя страдания славу и велелепие на тя возложил есть;
    Радуйся, яко тебе Царь царствующих и Господь господствующих блаженство Царствия Своего даровал есть.
    Радуйся, Царствия Христова сонаследнице;
    Радуйся, славы Божия сопричастнице.
    Радуйся, Параскево, невесто Христова всехвальная.


    Кондак 12


    Благодать от Бога дана ти есть подавати исцеления всем требующим, яко от источника пребогатаго, хранити же и соблюдати от различных болезней, бед и скорбей всякаго человека, верою, любовию и благоговением честная твоя страдания воспоминающаго и почитающаго. Молитвеннаго твоего о нас предстательства и благодатных дарований не лиши и нас, многострадальная Христова страстотерпице; да и мы, здрави суще телом и духом, в нынешней и будущей жизни о тебе поем Богу: Аллилуйя.


    Икос 12


    Поем твоя крепкия подвиги, почитаем страдания, хвалим долготерпение, ублажаем святую твою кончину, славим твое в немощнем теле непобедимое мужество, имже на земли и на небеси прославилася еси, святая и добропобедная мученице Параскево; и в честь твоих победоносных подвигов и страданий похвальная восписуем ти сия:
    Радуйся, от ангельских чинов в сожительство их любезно приятая;
    Радуйся, от девственных ликов в чертог небесный радостно введенная.
    Радуйся, от мученических полков под венец славы провождаемая во гласе радования;
    Радуйся, от небесных жителей приемлющая о Господе целование.
    Радуйся, яко мзда твоя многа есть на небесех;
    Радуйся, яко радость твоя вечна есть во светлости святых.
    Радуйся, в небесном чертозе божественнаго Жениха твоего со ангелы Его веселящаяся;
    Радуйся, лицезрением всеблагаго Господа тамо вкупе со святыми наслаждающаяся.
    Радуйся, душевных и телесных недугов наших целительнице;
    Радуйся, душеспасительных благ и небесных даров подательнице.
    Радуйся, яко тобою от нечаянныя смерти сохранитися уповаем;
    Радуйся, яко твоим заступлением вечную жизнь от Христа Бога улучити благонадежно чаем.
    Радуйся, Параскево, невесто Христова всехвальная.


    Кондак 13


    О святая, премудрая и всехвальная мученице, невесто Христова Параскево! От благоговейных сердец приносимую ти, аще и недостойную, хвалебную песнь сию приими от нас, яко усердную жертву сердец, любящих тя и чествующих святую память твою. Охраняй нас молитвами твоими святыми, и вся люди, притекающия к честней иконе твоей и с любовию лобызающия ю, избавляй от всякаго злаго обстояния и скорби; да тихое и безмолвное житие поживше в нынешнем веце, блаженство вечное наследим и купно с тобою и всеми святыми выну сподобимся воспевати Богу: Аллилуйя.

    Этот кондак читается трижды. Затем Икос 1 и Кондак 1.


    Молитва


    Святая невесто Христова, многострадальная мученице Параскево! Вемы, яко от юности твоея ты всею душею твоею и всем сердцем твоим возлюбила еси Царя славы, Христа Спасителя и Ему единому уневестилася еси, раздавши имения твоя неимущим и бедным. Ты силою благочестия твоего, твоим целомудрием и праведностию, яко лучами солнечными, просияла еси, живши свято среди неверных и безбоязненно проповедавши им Христа Бога. Ты, от дней юности твоея, наученная твоими родителями, всегда благоговейно чествовала дни искупительных страстей Господа нашего Иисуса Христа, Егоже ради и сама добровольно пострадала еси. Ты, десницею ангела Божия от неисцельных ран дивно исцеленная и восприявшая неизреченную светлость, изумила еси неверных мучителей. Ты, именем Господа нашего Иисуса Христа и силою молитвы твоея в капище языческом всех идолов долу повергши, в прах сокрушила еси я. Ты, опаляемая свещами, единою молитвою твоею ко всесильному Господу угасила еси огнь естественный, и тем же пламенем, чудесне возжженным чрез ангела Божия, попаливши неистовых беззаконников, мног народ привела еси к познанию истиннаго Бога. Ты, во славу Господа приявши мечное главы твоея усечение от мучителей, доблественно скончала еси страдальческий твой подвиг, возшедши душею твоею на небеса, в чертог вожделеннаго твоего Жениха Христа Царя Славы, радостно сретшаго тя небесным гласом: "Радуйтеся, праведнии, яко мученица Параскева увенчася!" Темже и мы днесь приветствуем тя, многострадальная, и, взирающе на святую твою икону, с умилением вопием ти: всечестная Параскево! Вемы, яко велие имаши дерзновение ко Господу: умоли убо Его Человеколюбца и о нас предстоящих и молящихся ти. Да подаст Он и нам, якоже тебе, терпение и благодушие в бедах и скорбных обстояниях; да дарует Он, ходатайством твоим и заступлением, радостное, благоденственное и мирное житие, здравие же и спасение, и во всем благое поспешение возлюбленному нашему отечеству, да ниспослет святое Свое благословение и мир, и всем православным христианам да подаст твоими святыми молитвами утверждение в вере, благочестии и святости, преспеяние же в христианской любви и всякой добродетели; да очистит нас грешных от всякия скверны и порока; да оградит нас святыми Своими ангелами, да заступит, сохранит и помилует всех святою Своею благодатию и соделает наследниками и причастниками Небеснаго Своего Царствия. И тако улучивше спасение твоими святыми молитвами, предстательством и заступлением, всеславная невесто Христова Параскево, прославим все пречистое и великолепое имя дивнаго во святых Своих истиннаго Бога, Отца и Сына и Святаго Духа, всегда, ныне и присно, и во веки веков. Аминь.

    Admin
    Admin

    Сообщения : 129
    Очки : 264
    Репутация : 0
    Дата регистрации : 2010-02-05
    Возраст : 41

    Акафист святой Февронии Муромской

    Сообщение  Admin в Сб Май 22, 2010 12:19 pm

    Акафист святым благоверным князю Петру и княгине Февронии, Муромским
    Тропарь благоверному князю Петру, в иночестве Давиду, и Февронии, в иночестве Евфросинии,
    Муромским чудотворцам
    Тропарь, глас 8
    Яко благочестиваго корене пречестная отрасль был еси, добре во благочестии пожив, блаженне Петре, тако и с супружницею твоею, премудрою Феврониею, в мире Богу угодивше и преподобных житию сподобистеся. С нимиже молитеся Господеви сохранити без вреда отечество ваше, да вас непрестанно почитаем.
    Величание
    Ублажаем вас, святии чудотворцы Петре и Февроние, и чтим святую память вашу, вы бо молите за ны Христа, Бога нашего.

    АКАФИСТ
    Кондак 1
    Избраннии чудотворцы и велицыи угодницы Господни, града Мурома заступницы и приснии о душах наших молитвенницы, святии благовернии княже Петре и княгине Февроние! Пение похвальное вам приносяще, молим вы усердно: яко имущии дерзновение ко Господу, предстательством вашим от всяких бед нас свободите, и наследники Царствия Небеснаго нас соделайте, да зовем вам радостно: Радуйтеся, святии и преславнии чудотворцы Петре и Февроние.
    Икос 1
    Ангели земнии и человецы небеснии воистинну явистеся, блаженнии Петре и Февроние, от юности вашея чистую совесть имущии к Богу, и добре во благочестии и чистоте вкупе пожившии, нам же оставльшии в пример подражания житие ваше богоугодное, емуже чудящеся и чудесы вашими озаряеми, зовем вам гласы хвалебными сице: Радуйтеся, от юности вашея Христа возлюбившии и Тому от души поработавшии; радуйтеся, целомудрия хранители и душевныя и телесныя чистоты рачители. Радуйтеся, души ваша и телеса на земли в обиталище Духа Святаго уготовившии; радуйтеся, исполненнии премудрости и разума божественнаго. Радуйтеся, яко во плоти, яко безплотни, вкупе пожисте; радуйтеся, яко равноангельную честь достойне приясте. Радуйтеся, яко от земли на Небо преидосте и тамо со Ангелы Троице предстоите; радуйтеся, яко со безплотными лики трисвятую песнь Ей воспеваете. Радуйтеся, на Небеси и на земли от Господа прославленнии; радуйтеся, обретшии вечное всесветлое место упокоения. Радуйтеся, града Мурома сокровища пребогатая; радуйтеся, источницы неистощимии чудес. Радуйтеся, святии и преславнии чудотворцы Петре и Февроние.
    Кондак 2
    Видев князь Петр в возвратной болезни своей, знамение гнева Божия, за неисполнение обета своего, пояти в супруги себе премудрую Февронию, потщася сие исполнити и сочетася с нею браком законным, Обаче и в супружестве целомудренно и богоугодно пожисте, блаженнии, имуще едину мысль во двою телу, еже благоугождати Богу; темже выну поете Ему ныне со Ангелы песнь: Аллилуиа.
    Икос 2
    Разумом богопросвещенным свыше одареннии, Петре и Февроние святии, любовь и милосердие к бедным и сирым явисте, обидимым и безпомощным заступницы бысте, и иными добродетельми многими украсисте княжение свое земное. Сего ради вопием к вам сице: Радуйтеся, блаженнии и треблаженнии, в боголюбии пожившии и благоверие сохраншии; радуйтеся, милости и сострадания преисполненнии. Радуйтеся, безпомощных скории помощницы; радуйтеся, печальных блазии утешители. Радуйтеся, сирот и вдовиц кормители; радуйтеся, сущих в бедах предстатели. Радуйтеся, болезней душевных и телесных искуснии целители; радуйтеся, скорбных сердец радостотворнии посетители. Радуйтеся, любовь вашу к Богу, любовию к ближним своим показавшии; радуйтеся, княжение ваше земное праведно и богоугодно содержавшии. Радуйтеся, князей православных похвало и града Мурома утверждение; радуйтеся, всея земли Российская заступление. Радуйтеся, святии и преславнии чудотворцы Петре и Февроние.
    Кондак 3
    Силою благодати Божия укрепляемь, блаженне княже Петре, восхотел еси паче оставити град отечества твоего и княжение Муромское, неже бракоразвестися с премудрою Феврониею по настоянию гордых боляр твоих. Сего ради Бог тя прослави и сотвори, да темиже боляры возвращенный вкупе с супружницею твоею, на престоле княжения Муромскаго паки утвердился еси, нам же пример хранения закона Божия показуеши подвигом твоим, да подражающе тебе в святости хранения соуза брачнаго, воспеваем подвигоположнику Христу: Аллилуиа.
    Икос 3
    Имуще попечение о людех своих, преблаженнии Петре и Февроние, неусыпно подвизастеся ко благу их, благочестие насаждая, нечестие искореняя и вражду умиротворяя. Темже и Господь, видя таковыя подвиги ваша, землю Муромскую плодоносием благослови и мир глубок княжению вашему дарова, подвизая люди ваша благодарственно воспевати вам сице: Радуйтеся, угодницы Божии, житию великих святых сопричастницы; радуйтеся, правителие предобрии, люди муромския ко спасению путеводившии. Радуйтеся, христианскаго благочестия блюстители; радуйтеся, нестроения, раздоров и всякаго нечестия искоренители. Радуйтеся, супругов христиан ко благочестному житию наставницы; радуйтеся, целомудрия и воздержания супружеская образи преизящнии. Радуйтеся, праведнаго суда рачители; радуйтеся, немздоимства и безкорыстия ревнители. Радуйтеся, святых царей Константина и Елены добродетелей стяжатели; радуйтеся, равноапостольнаго князя Владимира и блаженныя княгини Ольги достойнии преемницы. Радуйтеся, двоице пречестная и благое сочетание, лучами чудес немерцаемо сияющии; радуйтеся, отечества вашего пресветлии светилъницы. Радуйтеся, святии и преславнии чудотворцы Петре и Февроние.
    Кондак 4
    Буря скорбей и напастей, воздвизаемая злобою мира сего, не ослаби крепкую любве вашея яже к Богу, Петре и Февроние блаженнии, но паче научи вас благоискусно отражати разжженныя стрелы искушений диавольских: вы бо оболкшеся в броню веры Христовы, в мире глубоце преидосте многомятежную пучину житейскаго моря, и достигосте в тихую пристань спасения, к нейже и нас молитвами вашими приведите, да вкупе с вами поем Богу: Аллилуиа.
    Икос 4
    Слышавше ближнии и дальнии благочестное житие ваше, благовернии Петре и Февроние, прославляху человеколюбца Бога, даровавшаго вам крепость на вся дела благая, имиже яко лучами пресветлыми, просияете в отечестве вашем, идеже и доныне имена ваша честны, и подвиги ваша воспеваются похвалами сими: Радуйтеся, двоице пресветлая, Богом совокупленная; радуйтеся, светом благочестнаго жития вашего, яко светила богосветлая, просиявшии. Радуйтеся, милостынею и молитвами Небесное Царствие стяжавшии; радуйтеся, смирением и пощением вечное блаженство улучившии. Радуйтеся, яко мзда ваша многа на Небесех есть; радуйтеся, яко радость ваша вечна во светлостех святых. Радуйтеся, раби Христовы возлюбленнии; радуйтеся, святых всех приснии друзи. Радуйтеся, звезды непрелестнии, путь супружескаго жития богоугоднаго верно указующии; радуйтеся, облацы росоноснии, зной страстей и нечестия прогоняющии. Радуйтеся, Божиих милостей и щедрот нам податели; радуйтеся, отечества вашего украшение не отъемлемое. Радуйтеся, святии и преславнии чудотворцы Петре и Февроние.
    Кондак 5
    Богопросвещеннии светильницы благочестия и предивнии чудотворцы Петре и Февроние, Бога от всея души возлюбивше, вся заповеди Его сохранисте; темже и Христос, яко солнце и луну пресветлыя, показа вас, преблаженнии, чудес многих зарею озаряющия область Муромскую и всю страну Российскую, прославив нетлением святыя и многоцелебныя мощи ваша, к нимже припадающе, по достоянию ублажаем вас и выну благодарственно поем дивному во святых Своих Богу: Аллилуиа.
    Икос 5
    Видевше житие ваше праведное и щедроты ваша, людие муромстии славляху нас, своих правителей милостивых, благовернии Петре и Февроние, вы же смирение истинное возлюбивше и похвалы человеческия небрегше, гордынею неуязвлени пребысте, и тем показасте нам образ вышшаго смирения, емуже поучаяся, с любовию вопием вам таковая: Радуйтеся, славу человечу ни во что же вменившии; радуйтеся, смирение Христово усердно возлюбившии. Радуйтеся, заповедей Господних вернии исполнители; радуйтеся, учения Евангельскаго истиннии последователи. Радуйтеся, раби Бога Вышняго, волю Его сотворшии; радуйтеся, веру Христову до конца соблюдшии. Радуйтеся, христоименитым людем благочестия учители; радуйтеся, хотящих богоугодно жити богомудрии наставницы. Радуйтеся, молитвами вашими спасающии нас от всяких бед; радуйтеся, вся благая прошения наша исполняющии. Радуйтеся, в недузех страждущих благодатнии врачеве; радуйтеся, милостивии страны Муромския покровителие. Радуйтеся, святии и преславнии чудотворцы Петре и Февроние.
    Кондак 6
    Проповедницы веры православныя и ревнители благочестия не словом токмо, но всем житием своим бысте во граде Муроме, прехвальнии Петре и Февроние; темже и святая Церковь достойне почитает подвиги и труды ваша, имиже трудистеся во славу Бога Вышняго, немолчно воспевая Ему: Аллилуиа.
    Икос 6
    Возсиясте во граде Муроме светом добродетельнаго жития вашего, яко звезды богосветлыя, преблаженнии Петре и Февроние, и память ваша в нем с похвалами до днесь, яко и по смерти своей не престаете озаряти нас, многая чудесы совершающе, и теми светлую зарю безсмертия нам от мощей ваших возсиявающе, да ублажаем вас благохвалениями сицевыми: Радуйтеся, чина и уставов святыя Церкве вернии хранители; радуйтеся, служителей олтаря Господня благоговейнии почитатели. Радуйтеся, благих обычаев и преданий святоотеческих ревнители; радуйтеся, обычаев злых и суемудрий языческих искоренители. Радуйтеся, суды нелицеприятны людем вашим творившии; радуйтеся, суды ваша с милостию соединившии. Радуйтеся, кротцыи и незлобивии последователи Христовы; радуйтеся, злобу добром препобеждавшии. Радуйтеся, нетления благоухающии цвети; радуйтеся, безсмертия немерцающии лучи. Радуйтеся, на земли величием чудес блистающии; радуйтеся, на Небеси со Ангелы Бога славящии. Радуйтеся, святии и преславнии чудотворцы Петре и Февроние.
    Кондак 7
    Хотяй человеколюбец Господь явити в житии вашем, Петре и Февроние, образ назидания не токмо людем мирским, но и ликом иноческим, внуши вам в старости маститей оставити славу княжения земнаго, и восприяти образ иноческий, в немже подвизастеся добре постом, бдением и молитвою, воспевающе непрестанно Триединому Богу ангельскую песнь: Аллилуиа.
    Икос 7
    Новую благодать Божию во иночестем пострижении приемше, преподобнии, новыми подвигами украсисте равноангельное житие ваше и тако сугуб плод совершенства духовнаго Христу принесосте, и мзду преподобных достойне от Него восприясте. Поминая убо таковую ревность вашу к подвигом духовным, прославляем вас сими достодолжными похвалы: Радуйтеся, яко любве ради Господа, мира сего княжение и славу остависте; радуйтеся, яко иноческое равноангельное житие усердно восприясте. Радуйтеся, совершеннаго терпения подвижницы; радуйтеся, вольныя нищеты блаженнии стяжатели. Радуйтеся, прежде кончины вашея вся страсти умертвившии воздержанием; радуйтеся, восприявшии святую схиму в броню спасения. Радуйтеся, багряницу княжескую на власяницу иноческую пременившии; радуйтеся, постом, бдением и непрестанными молитвами Богу добре угодившии. Радуйтеся, боголюбезнаго уединения взыскатели; радуйтеся, спасительнаго безмолвия любители. Радуйтеся, слезами молитвенными орошаеми; радуйтеся, в сонме преподобных на Небеси прославленнии. Радуйтеся, святии и преславнии чудотворцы Петре и Февроние.
    Кондак 8
    Странное и дивное бе чудо, егда ты, блаженне Петре, на кончине живота твоего, прошения ради супружницы твоея, святыя Февронии, исходом своим умедлил еси, дондеже сконча она пелену церковную, ею сшиваему и вкупе с тобою к исходу смертному приспе, и тако неразлучнии в житии, неразлучнии в кончине явистеся, и во един день и час святыя души своя в руце Божии предасте, зовуще присно живыми и мертвыми обладающему Владыце Богу: Аллилуиа.
    Икос 8
    Вси чудяхуся и славляху дивнаго во святых Своих Бога, егда святыя ваша телеса, в разных гробех положенная, чудесно обретошася лежаща в общей гробнице, юже уготовасте себе, преподобнии, в соборней церкви града Мурома, идеже и доныне неразлучно почиваете, чудотворцы святии, неоскудныя источающе исцеления всем, с верою прибегающим к вам и зовущим: Радуйтеся, союз любве вашея до гроба и за гробом верно сохраншии; радуйтеся, не токмо в жизни, но и по смерти, о Господе соединеннии. Радуйтеся, в супружестем благочестнем житии вам подражающим крепцыи помощницы; радуйтеся, теплотою любве вашея и нас согревающии. Радуйтеся, смертию временною прешедшии к жизни вечней; радуйтеся, от Господа нетлением и чудесы прославленнии. Радуйтеся, яко память ваша с похвалами и успение со святыми; радуйтеся, яко имена ваша честна суть и благословенна в отечестве вашем. Радуйтеся, Российския страны удобрение благодатное; радуйтеся, града Мурома ограждение несокрушимое. Радуйтеся, о любящих и чтущих вас небеснии предстатели; радуйтеся, приснопросящии нам у Господа дары благости Его. Радуйтеся, святии и преславнии чудотворцы Петре и Февроние.
    Кондак 9
    Вси Ангели и святых лики радовахуся радостию велию, егда святыя души ваша достигоша вечнаго в обителех райских селения, и Сам Творец Ангелов и Святейший святых Царь Славы Христос, безсмертия венцы увенча вас и дарова вам благодать молитися Ему со дерзновением многим о всех ищущих вашего заступления, егоже не лишите и нас грешных, Петре и Февроние достохвальнии, смиренномудренно воспевающих прославльшему вас Богу хвалебную песнь: Аллилуиа.
    Икос 9
    Ветийство человеческое не довлеет к достойному прославлению дивнаго жития вашего, святии чудотворцы Петре и Февроние; кто бо исповесть вся моления и пощения, болезни и труды ваша? кто изочтет вся слезы и воздыхания ваша яже к Богу? Обаче мы любовию к вам подвизаеми, дерзаем воспевати вам сия малыя и нехитростныя похвалы: Радуйтеся, благодати Святаго Духа избраннии сосуди; радуйтеся, радости нам вечныя благоприятнии ходатаи. Радуйтеся, богобоязненных супругов в благочестии утверждение; радуйтеся, нарушителей супружескаго целомудрия и согласия грозное обличение. Радуйтеся, гнев Божий, праведно движимый на нас, молитвами вашими утоляющии; радуйтеся, о мире всего мира непрестанно Господа умоляющии. Радуйтеся, на враги видимыя и невидимыя крепцыи нам споборницы; радуйтеся, ангелонравнии человецы. Радуйтеся, преподобных и праведных сонаследницы; радуйтеся, Пресвятыя Троицы вернии угодницы. Радуйтеся, блаженнии обитатели горняго града Иерусалима Небеснаго; радуйтеся, со святыми торжествующии в скиниях райских. Радуйтеся, святии и преславнии чудотворцы Петре и Февроние.
    Кондак 10
    Спасение вечное унаследовавше богоблаженнии Петре и Февроние, душами вашими в обителех горних неразлучно в Бозе пребываете, святыми же мощами вашими в храме Божием нетленно вкупе почиваете, и обильныя исцеления источаете, да чудесы вашими благодатно озаряеми, хвалебно взываем Верховному Творцу чудес Богу: Аллилуиа.
    Икос 10
    Стену заступления, благоприятныя молитвы ваша к Богу, обретше, святии чудотворцы Петре и Февроние, благодарение Отцу Небесному усердно возсылаем за вся благодеяния Его, вами всем нам обильно являемая, вам же, предстателям нашим, сицевое приносим пение: Радуйтеся, всесветлаго Царствия Христова наследницы; радуйтеся, ангельских ликов собеседницы. Радуйтеся, Бога во славе неприступней созерцающии; радуйтеся, Трисияннаго Божества таинницы. Радуйтеся, со святыми на Небеси вечно царствующии; радуйтеся, от горних высот к земнородным милостивно приникающии. Радуйтеся, крини благоуханнии небеснаго прозябения; радуйтеся, кипариси чудоточнии рая Иисусова. Радуйтеся, податели независтнии безмезднаго врачевания; радуйтеся, совершители достохвальнии многих чудес. Радуйтеся, благодеяний множество нам источающии; радуйтеся, милостию сострадания вашего всех объемлющии. Радуйтеся, святии и преславнии чудотворцы Петре и Февроние.
    Кондак 11
    Пение молебное приносим вам, угодницы Божии Петре и Февроние, и с любовию припадаем к раце святых и многоцелебных мощей ваших, прославляя житие ваше богоугодное и подвиги многи. Молимся вам усердно, чудотворцы святии, помозите нам подражати вашим добродетелем, да возможем богоугодно пети Создателю нашему: Аллилуиа.
    Икос 11
    Света небеснаго исполнен бе соборный храм града Мурома, егда благоволением Божиим святыя мощи ваша Петре и Февроние, целы и благоуханны обретошася в нем, и из недр земных, яко сокровище драгоценное, изнесены быша, идеже и до ныне почивают, исцеления неоскудныя источающе недужным и болящим. Сего ради песненно вопием к вам: Радуйтеся, злато нетленное, в недрех земных обретенное; радуйтеся, бисери сияющии и благодатно просвещающии человеков. Радуйтеся, святыя Православныя Церкве похвало; радуйтеся, ересей и расколов обличение. Радуйтеся, свети умнии, зарею Святаго Духа облистающии; радуйтеся, мира благоухания Христова преисполненнии. Радуйтеся, облеченнии в ризу в благодатного нетления; радуйтеся, препоясаннии силою многих чудес. Радуйтеся, яко рака ваша честная врачебница явися недугом человеческим; радуйтеся, яко от нея всяк с верою приходяй дары целебныя приемлет. Радуйтеся, светлостию чудес ваших мрак душ наших озаряющии; радуйтеся, нетлением святых мощей ваших зарю общаго всех воскресения нам показующии. Радуйтеся, святии и преславнии чудотворцы Петре и Февроние.
    Кондак 12
    Благодать свыше вам дарованную, познавше, святии чудотворцы Петре и Февроние, с благоговением и любовию покланяемся нетленным и многоцелебным мощем вашим и от них приемлем в недузех исцеление, в скорбех утешение, в бедах благодатную помощь: темже и прославляем вас по достоянию, небесных предстателей и заступников наших, воспевающе хвалы и благодарения вами благотворящему нам Владыце Богу: Аллилуиа.
    Икос 12
    Поюще многая и преславная ваша чудеса, велицыи угодницы Божии Петре и Февроние, ублажаем вас, яко целителей, утешителей и помощников от Господа нам дарованных, и молитвенно торжествуем святую память вашу, от любве сердечныя воспевающе вам благодарственно и хвалебно: Радуйтеся, во благоухании святыни нетленно почивающии; радуйтеся, с верою приходящих к раце мощей ваших благодатно освящающии. Радуйтеся, призывающих молитвенно честная имена ваша скории услышатели; радуйтеся, упование на вас по Бозе возлагающих дивнии помощницы. Радуйтеся, известнии умилостивители Царя Небеснаго; радуйтеся, сильнии защитницы наши от врагов невидимых. Радуйтеся, приснии всем нам ходатаи спасения; радуйтеся, неотступнии хранители града Мурома. Радуйтеся, князей российских пречудная доброто; радуйтеся, отечества вашего Богом дарованнии покровители. Радуйтеся, телес наших благодатнии целебницы; радуйтеся, о душах наших усерднии ко Господу молитвенницы. Радуйтеся, святии и преславнии чудотворцы Петре и Февроние.
    Кондак 13
    О святии и преславнии чудотворцы, благовернии княже Петре и княгине Февроние! Приимите милостивно сие похвальное пение от нас недостойных во умилении вам приносимое, и вашим предстательством у Господа испросите нам утверждение в вере и добрых делех, и избавление от всех скорбей и болезней временных и вечных, да сподобимся вкупе с вами и всеми святыми во Царствии Небеснем пети Пресвятей Троице вечно хвалебную песнь: Аллилуиа.
    Этот кондак читается трижды, затем икос 1 и кондак 1
    Молитвы святым благоверным князю Петру и княгине Февронии, Муромским
    Молитва первая
    О велицыи угодницы Божии и предивнии чудотворцы благовернии княже Петре и княгине Февроние, града Мурома предстатели и хранители, и о всех нас усерднии ко Господу молитвенницы! К вам прибегаем и вам молимся с упованием крепким: принесите за нас грешных святыя молитвы ваша ко Господу Богу и испросите нам у благости Его вся благопотребная душам и телесем нашим: веру праву, надежду благу, любовь нелицемерну, благочестие непоколебимое, в добрых делех преуспеяние, мира умирение, земли плодоносие, воздуха благорастворение, душам и телесем здравие и вечное спасение. Исходатайствуйте у Царя Небеснаго: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Испросите Церкви святей и всей державе Российстей мир, тишину и благоустроение, и всем нам житие благополучное и добрую христианскую кончину. Оградите отечество ваше, град Муром, и вся грады Российския от всякаго зла и вся правоверныя люди, к вам приходящия и мощем покланяющияся, осените благодатным действом благоприятных молитв ваших, и вся прошения их во благо исполните. Ей, чудотворцы святии! Не презрите молитв наших, со умилением вам возносимых, но будите о нас приснии предстатели ко Господу и сподобите нас помощию вашею святою спасение вечное получити и Царствие Небесное унаследовати; да славословим неизреченное человеколюбие Отца, и Сына, и Святаго Духа, в Троице покланяемаго Бога, во веки веков. Аминь.
    Молитва вторая
    О угодницы Божии, благовернии княже Петре и княгине Февроние, к вам прибегаем и к вам со упованием крепким молимся: вознесите о нас, грешных (имена), святыя молитвы ваши ко Господу Богу и испросите у благости Его вся благопотребная душам и телесем нашим: веру праву, надежду благу, любовь нелицемерну, благочестие непоколебимо, в добрых делех преуспеяние. И ходатайствуйте нам у Царя Небеснаго житие благополучное и добрую христианскую кончину. Ей, чудотворцы святии! Не презрите молитв наших, но будите о нас приснии предстателие ко Господу, и сподобите нас помощию вашею спасение вечное получити и Царствие Небесное унаследовати, да славословим неизреченное человеколюбие Отца и Сына и Святаго Духа, в Троице покланяемаго Бога во веки веков.

    Admin
    Admin

    Сообщения : 129
    Очки : 264
    Репутация : 0
    Дата регистрации : 2010-02-05
    Возраст : 41

    Акафист святой Евфросинии Суздальской

    Сообщение  Admin в Сб Май 22, 2010 12:32 pm

    Акафист святей благоверней княжне преподобней Евфросинии Суздальстей

    Кондак 1
    Избранная от чрева матерня, угоднице Христова княжна Евфросиние, прославляюще прославльшаго тя Христа Господа, хвалебная приносим ти песни, мати преподобная; ты же, яко имущая дерзновение ко Господу, от всяких нас бед свободи, да зовем ти:
    Радуйся, Евфросиние, невесто Христова прекрасная.

    Икос 1
    Ангелов царица и мати Господа, провидящи равноангельное житие твое, услыша молитву святых твоих родителей, и разреши тобою неплодство их, трикратно тем явившися во сне, в знамение твоего избрания, блаженная. Мы же таковое о тебе Божие смотрение прославляюще, взываем ти:
    Радуйся, святый плоде, молитвами неплодствовавших испрошенный.
    Радуйся, честный даре, Приснодевою безчадствовавшым дарованный.
    Радуйся, чудным фимиамом, яко будущее благоуханное селение духа, до зачатия предзнаменованная.
    Радуйся, в предосвященном молитвою и Божиим благословением чреве зачатая.
    Радуйся, по зачатию, яко чистая голубица, от Пречистыя Девы даемою голубицею предобразованная.
    Радуйся, до рождения Царицею неба и земли в служебный лик себе предизбранная.
    Радуйся, еяже рождение Богородицею со святыми Антонием и Феодосием яве предвозвещено бысть.
    Радуйся, ейже имя, яко имевшей быти верною Богу рабою, Феодулия пронаречено бысть.
    Радуйся, рождением своим бывшее свыше обетование оправдавшая.
    Радуйся, по рождении абие великое свое предназначение проявившая.
    Радуйся, еще в пеленах сущи, пост иноческий державшая.
    Радуйся, от сосцу доилицы, егда тая мяса ядаше, николиже млека вкусити хотевшая.
    Радуйся, Евфросиние, невесто Христова прекрасная.

    Кондак 2
    Видяще родители твои, яко услышана бысть молитва их о тебе, блаженная, и чудящеся о явлениих Богоматере, во сне яко яве бывших, слагаху тая в сердце своем; велие же некое о тебе Божие смотрение в тех провидяще, радостно вопияху Богу: Аллилуиа.

    Икос 2
    Разумети хотя, по рождении твоем, Божие о тебе изволение, боголюбивая мати твоя, молящися усну, и виде себе во сне окриленну, в высоту парящу, и тя отроковицу Богу в руце вдающу; чесо ради Богу тя посвящающи по святом Крещении, вручи тя покрову и заступлению Царицы Небесныя. Мы же таковое предустроение о тебе славяще, хвалебно взываем ти:
    Радуйся, по изволению Божию, в дар Богу от рождения определенная.
    Радуйся, изначала, яко в небесная парити имущая, предуказанная.
    Радуйся, от купели живаго со Христом общения, взыскательницею быти предъявленная.
    Радуйся, во святом Крещении во Христа облекшися, христоподражательницею быти назнаменанная.
    Радуйся, в троекратном во имя Пресвятыя Троицы погружении, во свете лица Ея пребывати начавшая.
    Радуйся, в белы, во образ чистоты, ризы одеянием в чин непорочных вступившая.
    Радуйся, с возложением креста на выю, благое иго Христово носити восприявшая.
    Радуйся, с препоясанием чресл бодренною подвижницею Христовою быти себе показавшая.
    Радуйся, с горящею при купели свещею, в светлый лик благодатно освященных вчиненная.
    Радуйся, в троекратном окрест купели хождении, яко обрученная Христу невеста ликовавшая.
    Радуйся, в залог вечнаго с Небесным Женихом единения, святым миром запечатленная.
    Радуйся, в осуждение всякия скверны греховныя, на всех чувствах знамение дара Духа Святаго приявшая.
    Радуйся, Евфросиние, невесто Христова прекрасная.

    Кондак 3
    Силою свыше управляема, преуспевала еси возрастом и благодатию у Бога и человек; о чесом родители твои и южики радующеся, Богу, из уст младенец хвалу себе совершающему, взываху: Аллилуиа.

    Икос 3
    Имуще в памяти бывшыя о тебе знамения, и чудящеся необычному в отрочестве разуму твоему, родители твои разсудиша наипаче поучением божественных книг возгревати живущий в тебе дар благодатныя жизни, еже и соверши сам боголюбивый родитель твой святый благоверный князь Михаил. Хвалу воздающе таковому о тебе родителей твоих мудрому попечению, взываем ти:
    Радуйся, младенцем открываемых таин верное хранилище.
    Радуйся, отроковице, млеком слова животнаго воспитанная.
    Радуйся, дево, чистыми токи небесных истин напоенная.
    Радуйся, теплотою учения родительскаго, огнь любве к Господу в сердце твоем возгревшая.
    Радуйся, живыя стремления юности от земных к небесным возведшая.
    Радуйся, невесто, отцем по плоти в уневещение Христу Господу руководствованная.
    Радуйся, красото, паче всех красных мира, красоты райския любити наученная.
    Радуйся, розго Лозы Истинныя, Вертоград Христов измлада украшавшая.
    Радуйся, древо, от корене свята плоды благи рано приносити начавшее.
    Радуйся, из детства чистотою небесным силам подобившаяся.
    Радуйся, во всю жизнь осенением Приснодевы в непорочном девстве сохранившая.
    Радуйся, Евфросиние, невесто Христова прекрасная.

    Кондак 4
    Бурю внутрь имеяху помышлений родители твои, егда приспе время преподавати ти внешняя учения, да не како теми охладится сердце твое к небесным; ведуще же страх Божий и святое житие богомудраго болярина Феодора, того призваша научити тя всякой внешней мудрости, Богу просвещающему умы воспевающе: Аллилуиа.

    Икос 4
    Слышащи преподаваемая тебе о мире Божием учения, яко пчела, о внешних собирала еси сок, силою действовавшия в тебе благодати сладчайшаго паче меда Господа, в духовный сот превращала еси той, и вся искушающи, добрая точию держала еси. Таковую мудрость твою хваляще, взываем ти:
    Радуйся, от видимых тварей к невидимым Божиим возносившаяся.
    Радуйся, от красот мира к краснейшему паче всех любовию возгаравшаяся.
    Радуйся, созерцанием небес, славу Божию поведающих, к снисканию славы пренебесныя воскрилявшаяся.
    Радуйся, от излияния света солнечнаго на злыя и благия, богоподобной любви научавшаяся.
    Радуйся, во образе солнца, всевидящее око Божие умным оком своим зрети учившаяся.
    Радуйся, в различии славы солнца, луны и звезд, различие небеснаго по делом прославления познававшая.
    Радуйся, от воздыханий суете неволею повинувшияся твари, блаженный о гресех плач восприявшая.
    Радуйся, в тяготе вещей земных, тяготу грехов проразумевавшая.
    Радуйся, стремлением огня горе, горняя мудроствовати научавшаяся.
    Радуйся, прехождением образа мира сего, в любви к благом непреходящым утверждавшаяся.
    Радуйся, в строении вещей земных, тайны устроения спасения прозревавшая.
    Радуйся, яко злато огнем искушаемое, очистительный искушений огнь радостно терпети предначинавшая.
    Радуйся, Евфросиние, невесто Христова прекрасная.

    Кондак 5
    Боготечной звезде, волхвов к Солнцу Правды приведшей иногда, подобящися в дому и княжении родителей твоих, на путь спасения приводила еси всех, на святое житие твое взиравших, и словес данныя тебе премудрости слушавших, иже, тобою просвещаеми, Богу тя умудряющему радостно взываху: Аллилуиа.

    Икос 5
    Видеша тя умом и красотою паче всех дщерей высокородных славну сынове княжестии, и молением стужиша родителем твоим, пояти тя ищуще; но не получиша желаемаго, Богу лучшее нечто о тебе устрояющу. Мы же о тебе путем Божиим чудящеся, взываем ти:
    Радуйся, красотою души, паче неже лепотою тела, всех другинь превосходившая.
    Радуйся, святостию жития, паче неже благородством рода, прославившаяся.
    Радуйся, славных и прекрасных искателей твоих ни во что же вменившая.
    Радуйся, краснейшаго паче всех человек всем сердцем взыскавшая.
    Радуйся, к единому жениху Христу тайным сердца желанием влекомая.
    Радуйся, Тому, Егоже возлюби душа твоя, невидимым Божиим промышлением блюдомая.
    Радуйся, единаго Господа невозвратным помыслом себе избравшая.
    Радуйся, умом и сердцем в Нем исчезавшая.
    Радуйся, именем Иисуса, паче мира благоуханна, услаждавшаяся.
    Радуйся, теплотою любве Христовы, паче солнца светозарна, согревавшаяся.
    Радуйся, во еже духовне Христу обручитися достойно себе уготовлявшая.
    Радуйся, боголюбезным добронравием, внутрь и вне, богато себе украсити ревновавшая.
    Радуйся, Евфросиние, невесто Христова прекрасная.

    Кондак 6
    Провозвестницы бывше божественнаго о тебе промышления родители твои, тайным Божиим велением влекоми, соизволиша на моление Мины, князя суздальскаго, паче других искателей твоих и родом и делы славна, и на Бога все упование возложше, на брак тя с ним благословиша, воспевающе вся премудре строющему: Аллилуиа.

    Икос 6
    Возсия свет утешения в души твоей, егда в слезных молитвах поведавши скорби сердца твоего владычице Богородице, о внезапном устроении жизни твоей не по сердцу твоему, услышала еси радостный Тоя глас, волю родителей исполнити тебе повелевавший, и не разоритися обетом и желанием твоим обещавший. Таковое Матери Божией к тебе благоволение славяще, ублажаем тя, вопиюще:
    Радуйся, невесто, дивными путьми во объятия Христова наставленная.
    Радуйся, дево, матерним Приснодевы попечением руководствованная.
    Радуйся, теплым воли родителей повиновением связуемая.
    Радуйся, и неизменным желанием девства снедаемая.
    Радуйся, таковое в сердце распятие ради Господа претерпевшая.
    Радуйся, преданностию воли Божией, яко на кресте себе в жертву Богу принесшая.
    Радуйся, любовь ко Господу с покорностию родителем сочетавшая.
    Радуйся, уповательным послушанием и честь браку воздавшая, и честнейшее брака девство сохраншая.
    Радуйся, на брак ити напутствованная, и в безбрачии пребыти несомненно чаявшая.
    Радуйся, на пути во мрак сокровенных о тебе путей Божиих с трепетом воззревавшая.
    Радуйся, в приражении недоумений о будущем, на камени упования крепко утвердившаяся.
    Радуйся, в данном тебе Богородицею обетовании, яко на лоне матернем упокоевавшаяся.
    Радуйся, Евфросиние, невесто Христова прекрасная.

    Кондак 7
    Хотящу тако Божию вседержительству, князь Мина, еще не доспевшей тебе града Суждаля, предаде дух свой в руце Божии. Ты же от всяких уз земных свободу улучивши, радостно воспела еси славу Богу: Аллилуиа.

    Икос 7
    Новую показала еси добродетель, блаженная, егда твердое восприяла еси намерение не возвращатися в дом родителей, вселитися же во граде Суждале, во обители положения риз Божия Матере; идеже сокровища своя бедным иждивши, ангельский образ прияла еси. Таковое твое мудрое о себе и спасительно бывшее нам изволение славяще, взываем ти:
    Радуйся, во уповании своем не постыжденная.
    Радуйся, получением желания своего обрадованная.
    Радуйся, от треволнений мира в небурном пристанищи укрывшаяся.
    Радуйся, вожделенному тебе лику дев радостно сопричетшаяся.
    Радуйся, вся утехи земныя во уметы вменившая.
    Радуйся, сокровища вена твоего руками нищих в небесныя сокровищницы предпославшая.
    Радуйся, любве ради ко Христу в нищету Его облекшаяся.
    Радуйся, всю славу мира иноческим смирением поправшая.
    Радуйся, в пострижении иноческом желанием строгаго постничества горевшая.
    Радуйся, с принятием иноческаго образа духовное всеоружие восприявшая.
    Радуйся, по оставлении мира о едином на потребу точию помышлявшая.
    Радуйся, по вселении во обитель черноризиц, духом в общении ангел и святых жити наченшая.
    Радуйся, Евфросиние, невесто Христова прекрасная.

    Кондак 8
    Странно житие восприяла еси во обители, преподобная, смиривши себе паче всех; княжна бо сущи, черноризицам проста рода Христа ради служила еси, поношением Христовым честь рода своего возвеличивши, Богу дивныя подвиги твоя прославльшу, Емуже вопием: Аллилуиа.

    Икос 8
    Вся в вышних была еси духом, преподобная, и божественною укрепляема благодатию, во всех добродетелех преуспевала еси, образ совершеннаго иноческаго жития всем, сподвизавшымся ти, подавающи. Темже ублажаем тя, всехвальная:
    Радуйся, подвигом добрым подвизавшаяся.
    Радуйся, чтение свое добре совершившая.
    Радуйся, страхом Божиим всякое нечистое желание побеждавшая.
    Радуйся, памятию о смерти всякое суетное попечение отгонявшая.
    Радуйся, пощении и бдении плоть свою смирявшая.
    Радуйся, умным деланием душу свою выну горе восторгавшая.
    Радуйся, всегдашним уединением от соблазнов мира чувства своя соблюдавшая.
    Радуйся, бодренным трезвением от злых помыслов сердце свое охранявшая.
    Радуйся, в молитвах неусыпная, и в чтении Божественных книг ненасытимая.
    Радуйся, на всякое послушание скорая, на исполнение же воли своей косная.
    Радуйся, терпения, кротости и любве зерцало.
    Радуйся, сердечнаго сокрушения, всегдашняго плача и покаяния правило.
    Радуйся, Евфросиние, невесто Христова прекрасная.

    Кондак 9
    Ангелоподбным житием просиявши, жезл настоятельства прияла еси, блаженная, и добре правящи обитель сию молитвою и примером жизни своея, словом научения и устроением чина иноческаго, душы тебе вверенныя к Богу приводила еси, научающи вся пети Ему: Аллилуиа.

    Икос 9
    Витийствующий язык не может изглаголати мудрости твоея начальственныя, егда дев от вдовиц отделила еси, да не како от взора и речей помыслы о сластех житейских приемше, осквернятся теми в сердце своем, и в добром течении своем запяты будут. Чесо ради дань хвалы тебе приносяще, взываем:
    Радуйся, душ боголюбивых мудрая руководительнице.
    Радуйся, невест Христовых неусыпная блюстительнице.
    Радуйся, в управлении своем простоту с мудростию соединившая.
    Радуйся, в начальствовании своем снисхождение с взыскательностью сочетавшая.
    Радуйся, строгость власти материнскою любовию умерявшая.
    Радуйся, материнскую любовь строгостию власти отрезвлявшая.
    Радуйся, мудрыми наставлении добрых в добре утверждавшая.
    Радуйся, и единым взором неисправных к исправности подвизавшая.
    Радуйся, крепкою молитвою невидимыя стрелы вражеския от обители отражавшая.
    Радуйся, мудрыми порядками внешния соблазны мира от сестр отвращавшая.
    Радуйся, теплыми попечении земную обитель в рай претворившая.
    Радуйся, устроением истиннаго иночества, вход в Царство Небесное всем угладившая.
    Радуйся, Евфросиние, невесто Христова прекрасная.

    Кондак 10
    Спасти хотя тобою душы многих, милосердый Господь многими дары обогати тя, преподобная, чудотворения и пророчества, прозорливости же и слова помазаннаго, имиже прославляющи ущедрившаго тя Господа, подвигла еси пети Ему всех: Аллилуиа.

    Икос 10
    Стена была еси обители твоей, егда от неистовства Батыева молитвами твоими сохранила еси ю невредиму. Таковое дивное твое заступление поминающе, взываем ти:
    Радуйся, трудолюбным Богу служением дерзновение к Нему стяжавшая.
    Радуйся, совершенным страстей очищением Божие благоволение к себе привлекшая.
    Радуйся, благодатей богоизбранный сосуде.
    Радуйся, духа благодвижный органе.
    Радуйся, алчущыя ведения душы манною Божественных истин питавшая.
    Радуйся, благочестивых сувства благоуханием обетований услаждавшая.
    Радуйся, недуги душевныя словом действенным врачевавшая.
    Радуйся, болезни телесныя именем Иисусовым исцелявшая.
    Радуйся, будущая яко настоящая, провидевшая.
    Радуйся, дальняя, яко близ сущая зревшая.
    Радуйся, помышления сердечная Духом Божиим прозревавшая.
    Радуйся, потаенныя страсти Божиим озареним обличавшая.
    Радуйся, Евфросиние, невесто Христова прекрасная.

    Кондак 11
    Пение всякое превосходят небесная утешения, богоблаженная, имиже труды и подвиги твоя увенча Христос Господь в небесных обителех, идеже водворяющися со ангелы и всеми святыми непрестанно воспеваеши Ему: Аллилуиа.

    Икос 11
    Светоподателен светильник всякаго утешения была еси, по преставлении твоем, преподобная мати; яви бо тя Христос Господь молитвенницу и ходатаицу всем, с верою к тебе прибегавшым. Мы же твоим заступлением ограждаеми, зовем ти:
    Радуйся, по преставлении своем Господом Неба и земли милостивно приятая.
    Радуйся, по отшествии от земных в Небесных обителех водворенная.
    Радуйся, венцем славы за смирение венчанная.
    Радуйся, на престоле царствия за победы над страстьми посажденная.
    Радуйся, от манны сокровенныя за сокрушение и слезы услаждаемая.
    Радуйся, от древа животнаго за многия лишения питаемая.
    Радуйся, с Царицею Несесною у Престола Царя царей предстоящая.
    Радуйся, с ангелы и всеми святыми заступлением своим нас приосеняющая.
    Радуйся, мати, и с Неба любящих тя теплотою любве согревати не преставшая.
    Радуйся, и среди небесных утешений земных чад своих не забывшая.
    Радуйся, ходатаице усердная, прибегающих к тебе не посрамляющая.
    Радуйся, молитвеннице крепкая, смиренных к тебе молитв не презирающая.
    Радуйся, Евфросиние, невесто Христова прекрасная.

    Кондак 12
    Благодать на благодать бысть нам открытие нетленных мощей твоих, преподобная, в нихже источник всякаго утешения стяжавше, величаем возвеличившаго тя Христа Господа, благодарно поюще Ему: Аллилуиа.

    Икос 12
    Поюще дивнаго во святых своих Господа, тя, яко избранную невесту свою, славою и честию венчавша, и твое милостивое и скорое во всех нуждах наших заступление и всепоможение прославляюще, благодарно зовем ти:
    Радуйся, всеусердная наша предстательнице.
    Радуйся, неотступная наша хранительнице.
    Радуйся, обители сея твердое ограждение.
    Радуйся, града нашего верное защищение.
    Радуйся, скорбящым отрадо и утешение.
    Радуйся, обидимым прибежище и заступление.
    Радуйся, болящих неоскудное врачевание.
    Радуйся, бедствующих благонадежное избавление.
    Радуйся, благочестивым царем нашым скорая помощнице.
    Радуйся, христолюбивому воинству необоримая споборнице.
    Радуйся, сене, от праведнаго гнева Божия нас укрывающая.
    Радуйся, росо, огнь всяких скорбей и страстей прохлаждающая.
    Радуйся, Евфросиние, невесто Христова прекрасная.

    Кондак 13
    О преславная мати, приими малое сие тебе наше приношение, и твоим теплым у Престола Божия ходатайством, избави нас от враг видимых и невидимых, от всяких бед и скорбей, от всякаго губительства и вечныя смерти, да с тобою и всеми святыми, в Царствии Небесном, сподобимся со всеми пету Богу Спасителю нашему: Аллилуиа.
    Кондак сей глаголи трижды, таже Икос 1 и Кондак 1.

    Молитва
    О преславная мати, скорая наша помощнице и заступнице, и неусыпная о нас молитвеннице. Предстояще раце мощей твоих, и тя яко живу сущу зряще, припадающе молимся тебе: приими прошения наша, и принеси я ко Престолу милосердаго Отца Небеснаго, яко дерзновение к Нему имущая, испроси притекающым к тебе и всем православным христианом вечное спасение и временное благоденствие, на вся благая дела и начинания наша цедрое благословение, от всяких бед и скорбей скорое избавление. Ей, чадолюбивая мати наша, тебе предстоящей Престолу Божию, ведомы нужды нашя духовныя и житейския, призри на ня матерним оком, и твоими молитвами отврати от нас колебание всяким ветром учения, злых и богопротивных обычаев умножение; утверди же во всех веры согласное ведение, взаимную любовь и единомыслие, да всем и словесы, и писании, и делы, славится среди нас всесвятое имя Отца и Сына и Святаго Духа, Единаго Бога, в Троице покланяемаго, Емуже честь и слава, во веки веков. Аминь.

    Спонсируемый контент

    Re: Как молиться перед началом вышивки, шитья

    Сообщение  Спонсируемый контент


      Текущее время Пт Ноя 16, 2018 6:42 am